| تبليغات | X |
نيفرتلره قارشي، د ه لي عوصياندي محبت
قوش دان وگونش دن تؤره ميش جان دي محبت
نور ائلچيسيدير قان قارالان چاغدا اينانديم
ظولمت سينهسين پارچالايان داندي محبت
قورخونج شبحدير دئيهسن سئوگيسيز آنلار
قانسيز ياشانان آنلارا قالخاندي محبت
مين ـ مين يازيلا آربادي هر سطري، اونونچون
مين كنده حؤكوم سورمهيه بير خاندي محبت
بير ميصراع ياشاتميشدي مني سؤز دوشونندن
نيفرتلره قارشي ده لي عوصيان دي محبت
سسله مني…
سسله مني…
اوزاق ـ اوزاق يوللار گئدن
ديلكلريم آرقيشلاري.
ائكيزلشك
توتاق اوْدا؛
خزانلاشميش كؤنوللره
آداخلانميش سرت قيش لاري.
سسلهمهسن
سسلهمهسن
دلي قانلي قوْرخونج فيكير
هؤپوردجك گنجلييمي
قودوز آزمان ديشلرينده.
سسله مني…
سسله مني…
بوراخسان قاپاجاق بو ايت اوغلو ايت
_
غفيل گلن بو آغريني دئييرم- سس لر گلير؛قيزيل گولون اوغونتوسوتاخيل تارلاسينا آچيلان آتوشگه سانكي.
گئرچك اولمور،
كؤپك سرطانين مني ياخالاما ائحتيمالييارامي بوغدا باغلايير.
تبريزخسته خاناسي اسفند ۸۷
اي منيم گؤزلهيهنيم! گؤزله مني گلمهلييم
و گليب آغري باغيندان آغيلار درمهلييم
ياغيشا قارشي آچيلميش، من او جوت پنجرهني
بؤرتیکان چرتمیش الیمله گونشه سرمه لی یم
آغلاییب يوللارا آدديملاريمي يول اوزونو
داغينيق ساچلارينا اؤلمز اثر بستهلييم
گليرم هئي گليرم يوللارا آلقيش نه ياغيش!
من گرك تر باخيشينلا گئجهني حربهلييم
بير چوبان ني ووراجاق، اوخشاياجاق كؤنلوموزو
آغلاماق بسدي داها، گول، سنه گول درمهلييم
تانییرسانمی منی؟گؤوده می طوفان سارمیش
اودو شعريمده گولوم منده حزين كلمهلييم
دؤرد فصيلدن بيري يازدير منه دردين يازدير
گود مني، گؤزله مني، گلمهلييم، گلمهلييم.
(....)
شه هر
گؤزیاشیندا
گومولموش گلین.
دومان پنجره مده
دارا چکیلمیش
یاغیش یول یئرییر
تر یاناغیمدا
تاپدیغیم بیر قورتوم
قان؛
چاناغیمدا.
اعتراض
ایسته میره م کیفسیمیشِ
ایستکلرین الینده
بوخوولانا ايسته ييم.
ایسته میره م یاشامیم
آغری یاغان
دؤرد دووارین
اوره یینده قویلانا
یازیق آنام یاشادیغی
گون کیمی.
"ساییر باییر"
حسرتلی گئجه لر
آیسیز گئجه لر
اوره ییمی ایشدن سالمیش گئجه لر
اولدوزلاری داللانمیش گئجه لر
قارانلیق
قانلی
قارلی
قانسیز گئجه لر
گونش سیز
اومودسوز
باهارسیز
بارسیز گئجه لر
سیزی یاشامیشام یانمیشام.
یانماق یاشام دئییل می؟
"اوخونولماز كيتاب " 
اوخونولماز بير كيتابام
گؤزه گلمير
اودور يارام.
شعره بویلو شانلی قلم-
اؤلسون دييه
قورخونج الم؛
«قوشا لوله گؤزلريمله»
بو يانغينين سؤنمه يينه
يالنيز بير يول آنلاييرام،
انتيقا م
انتیقام...
باهار كيمي
گلمه ييندن اؤتدو داي ؛
اؤلوم كيمی
گلمه ييني گؤزلرم !
Bahar kimi
gəlməyindən ötdü day ,
Ölüm kimi
gəlməyini gözlərəm !
"محمد حیدری"نین اونودولماز وارلیغینا
تورپاق اوغلو ايدي،تورپاق اوغلو . ایشی، آغاجلاری قیشین آغیر یوخوسوندان اویاتماق ايدي، اویاتماق. یارا یارغان آچمیش اوره کلی اللری له1700 آغاج اکمیشدی. شاختا داندي آغاجلا رین ، چیچک لرین آغ یوخوسون قان بویادی. داش باشینا دوشسون باهار، داش باشینا.هم باغیمی الد ن آلدین،هم باغبانی.
ومن ایندی شاختا دانميش
هر آغاجین گؤرکمینده
بیر "ممدین" گؤیرمه سین گؤزله ییره م
گئج ـ گئج دؤنن هرباهاردا
وهر آغاج بیر"ممد" دیر
1701آغاج دیر
کؤنلوموزده قالاجاق دیر.
ياز۸۳
ييخيلديم ياشامي
گؤز ائيوانيمدان.
اوندا کی ائشیتدیم
اومودسوزجاوان
سئوگی سیز،
چؤرک سیز،
وارلیغی یاوان
خیابان- خیابان
بؤیره یین ساتماغا
آدام آختاریر.!
آغري آغزيندا يئم اولماقدادي باغريم ملهييم
قييما من بير قوزو تك چؤلده چوبانسيز ملهييم
آغلاييش اللري آتميش مني درد تنديرينه
گؤز ياشيندان منه وئر گؤز ببهييم، گؤز ببهييم
ايتميشم اورمان آرا، آه جاناوار قورخوسو وار
گل كي وارليق ديلهيين، اوركك اوركده بلهييم
هئچ منيم آغليما سيغمازدي گؤزل گولشن آرا
ياشلارين قانلي الينده بئله درد ايلمهلهييم
شيغيييب ايلديريمين بوز سسي ووُرسا آغاجي
من آغاجليق باشي اوسته گرهييمدير ال، اييم
هايلا سن هايلا مني، اي دلي سوْي آرزولاريم
كيم گونشلر بولاغين قانلي گؤزومله چيلهييم .
آجلیق 
آجلیق
آجلیق.
شعره سیغمادی...
1
آلچاق دووار آلنیندا من
بوز بولوگه
اوخشاییرام.
سئوینج
سووا
گؤرکمیمه.
2
ايشيقلار يوردونا
قوناق گئديرم
گؤزومده كاينات
نورلو گؤرونسون.
Y o l d a ş
Adaşım “Behruz qazizadə”nin
acınacaqlı ölümünə.
O yağışlı və soyuq axşamlarda
dostluq
bir paprızın
əldən -ələ
qonmasindan başlanirdi
və göz yaşlarımiz
əllərimizi suvarırdı
biz dumanlar arxasında
baxışlarda
bölüşürdük
qaranlıqları
və külə dönmüş
bir yoldaşin
tuturduq adını
ağzımızın
acısını dərirdik
"گؤزو یولدا قالان ال"
دره لر قوینوندا
جوشان بولاقلار
سنین چون تؤکدویوم
گؤزیاشلاریم دیر
یاسینی ساخلایان
چیلپاق آغاجلار
دؤنوک لوک بیلمه ین
قارداشلاریم دیر
داریخیرام وارلیغین
دمیر چاغیندان
بیرشعیر هؤنکوروم
سنه بو آخشام
وگؤزو یوللاردا قالمیش الیمله
یولوندا یاندیریم، سؤنمز بیرآغ،شام.
(....)
۱
من بو گون خوشبختم
چونكو ريه لريم
هله پاپريز ائشمه گه
ايمكان وئرير.
و دوستوم بورجلاريني
اؤده ميش
آدديملاريم
مندن اؤنده گئدير.
شا ما ،
شعير واريميزدير.
2
ياغيش یاغیر...
سس لنمير سسيم.
سيملرين سو وورموش
تئلفونوم كيمي.
3
ياغيش ياغیر...
ديلسيز قالان گوموش پوللار
جيبلريمده سؤيونور.
4
آغاج ومن
ایکیمیز
پاییز دوغور
ایچیمیز.
(….)
اسماعيل پيل پايه
گؤوده نه قار یاغمیش سانکی.
سینه نده ایکی وولقان،
ایپک کیمی .
گوزلرینده ایکی گونش،
قارانلیقدا آی کیمی.
و اللریمده ایکی تومورجوق
گلیشینله قاپالی گوزلرینی آچیر.
ساچلارین سا
اویناییب اوخویور
یئلده یارپاق کیمی .
آیاقلاریندان
ساچلارینا قدر
اوجالیرام دوداقلاریم لا.
"درد داش"
توپوروم بیر بئله وارلیق دئییلن یوخلوغا من
کی منیم
و سنین
وبیزیم باختیمیزا
قانلی قارانلیق قالاییر.
درد داشیم
دردلی آنام
آغریير دردلی باشیم
سرگیلن تابوتومو
سورونوب اؤلمه یه دوغرو
یول آشیم
آغریير دردلی باشیم.
(....)
گؤزلريم گؤلونده
چيپچالانان قان
قولاق وئر اينله سين قوي سنه داستان:
اؤلوم دادیندادیر
آغیزدا تام لار
قوشلار اوچان یؤنه
باخماز آداملار
توختاماز یارادیر
چیلپاق گونوزلر
گؤسترمز یارامی
قانلی گوزگولر.
گولوردوم
دوداغیم اوچوقلاییردی!
اؤزومسه اؤزومو
سوراقلاییردی.
توتاراق یارالی
باغریم الیندن
بیر درين دره نين
یارغانین آشدیق
اللرین قوروسون
سنین آ...ي ا و و چو
آلقانا
آلقانا
... قانا بلشديك.
سئویملی دوستوم"بابک آذری" اوچون
منی یادا سالاجاقسان
سن اورييم مئشهسينده
دؤرد فصيلده
گؤم ـ گؤي قالان
بوی بوخونلو بیر
آغاجسان.
من بيليرم
سؤز دوشنده
كؤنول آدلي بير ملكدن
مني يادا سالاجاقسان.
دردين،
كؤرپه اورييمده
قالانديقجا
قالاجاقسان.
اؤز الينله
ياراتديغين
يانا ـ يانا
آناجاقسان.
"دونياني وئره يين چوجوقلارا\هئچ دئييلسه بير گونلوگونه"سويله ديينده
چوخ حاقلي اولدوغونو اينسان بؤيودوكدن سونرا بيلير. "اينسان چوجوق دور گئريسي كيرلنمه"."اولوسو اولمايان ببك"لر و بو اؤلومسوزلوك چيچكلري ساييلان اوشاقلارين ياخشي گون ياشاسينلار دئييه گونلريني تبريك دئييب و1385 جي ايلده چاپ اولونموش" گلين گئدك گونش گيله"آدلي اوشاق شعير كيتابيمدان بير نئچه سيني بوتون دونيا اوشاقلارينا ارمغان ائديب وبير داها "منيم گوللريم سئويننن اوشاق گؤزلرينده آچار "آرزوسونا بويانيرام.
1
شعريمه گوج وئرن
اينجي دي
يوللار
حاييف!
باداقلي قيچيمدان
اينجيدي يوللار...
2
دهره قورخوسونو
ياشايان آغاج
خزل مزاريندا
قويلانار آنجاق.
3
سن اي سو سسلي سئوگيليم
سئوه جه يم
سني من
بيرينجي شعريمين
چاپ سئوينجي تك.
4
كؤز قالاندي
كؤكسوم ايچره
اوره ييمين چيرپينتيسي
يئلپيك اولدو.
5
گئديشين سه
كدر دولو
آنلاريم
گليشي نين
آدي نيميش
آنماديم.
" گل قارنینا قایتار منی"
بهروزصدیق
تانریم ـ تانریم .هاچاناجاق گؤره ن جئیران گؤزلو کؤرپه لربؤیوک
لرین یانلیشینا یاناجاقلار.یارا یارانی مینیر،بوسنیانین، فیلیسطینین،
قانی دورمور.آفریقانین قارنی آج دیر.وبیر آددیم آتساق بئله آذربایجان کؤرپه لری
سویوق چادیر دیره گینده ایللر دیر کی آسیلمیش دیر."قاراباغ"سا قاراگونلو.
بومبا گؤرور یوخوسوندا
افغان،عراق کؤرپه لری
یارا
یارا
یارا
یئر کوره سی "جهننمین او بير آدی" ،یئر کوره سی رویالارین آرزولارین قبریستانی
گؤیده ن داها یاغیش کوسموش،یئرده داها چیچک بیتمیر و اولدوزو سورگون ائتمیش گولله،مرمی.
آیغیمیزدان اینجییب دیر داها تورپاق.اؤلوم گزیر هر کوچه ده الی قانلی
کؤلگه سینده ن قورخور جانلی.ناغیلا یاد.اینینده کی پالتاریندان قورخور کورپه.
دیلیم ده لال آناسیندان قورخور کؤرپه!
ـ آنا!آنا.
ـ نه دیر کؤرپه م.
گل قارنینا قایتار منی.
(....)
پاپریزسیزلیق
سنسیزلیک
باش آغریسی
ایش سیزلیک
یاریمچیق قالمیش
کؤوره ک بیرشعیر
حیاتدان پایین
بونلاردیر:
دئییر.
Paprizsizliq
Sensizlyik
Baş ağrisi
Işsizlyik
Yaryimçiq qalmiş
Kövrek bir şeyir
Heyatdan payin
Bunlardir
deyir
1377
Dostum !
dunən bu yiyəsiz urəyimin əlində qalmışdım
yollaşmadıq.
bu gun
qorxu dolu
boş əllərim
ayırmir əllərin
başımdan mənim
ax!
urəkli əlimin
yarası yarğan
şəhər
qudurğan
və körpəm dil açır
ana dilində.
دوستوم!
دونن بو يييهسيز اورييمين الينده قالميشديم
يوللاشماديق.
بو گون
قوْرخو دوْلو
بوش اللريم
آييرمير اللرين
باشيمدان منيم
آخ!
اوركلي اليمين
ياراسي يارغان
شه هر
قوُدورغان
و كؤرپهم ديل آچير
آنا ديلينده.
(.....)
بومنیم گؤزلریم.
بومنیم دیشیم.
بوداکی اللریم.
اوتانجاق،
حایالی بیر قیز.
الیمده کی گوزگونو
باخیشیزلا قیردینیز.